اختار صح

ايوه يا سادة ايوه انا بنت
عايشة وشايلة انا جوه في قلبي
حلم دعاء وسميرة وهند
قلبي يرفرف اما يشوف
ضحكة بطة وفرحة سلمي و بسمة عهد
واما في يوم بلمح بعنيا
دمعة في عين شيماء أو سارة ولا لـ شهد
وقتها بس بحس بعجز
عجز في قلبي عجر في روحي
إنْ أنا ليا اصحاب كـ الورد
ليه الورد ده يزعل يوم
ليه يتجرَّح ويجيب دم
ليه رجالة مالهاش قلب
عايشة بتظلم وبتتجبر
ولَّا ظروف مليانة ندوب
عمالة تِجرح وبتتأمر
تبدأ بقي تصنيف ومقايضة
اصل دي عانس ولا دي بايرة
ولا دي فاتها القطر باينه
يمكن تلحق لأ ما باينشي
يخربيت عقم التفكير
واما ننادي نقول تغير
يطلع افندي ملوش في الليلة
ويقولك يلا وهيلا بيلا
يلا يا حلوة انا عندي عريس
ومناسب وهيملي الكيس
هو السن كبير معلشي
بس ده برضه ما يعيبهوشي
ده هيصرف وتعيشي بلوشي
وانتي يا حلوة بقيتي كبيرة
عاجبك يعني قعدت مروة ولا سعاد ولا اميرة!
تبدأ هي يا قلبي تفكر
تسكت مرة وتبكي التانية
تصرخ يوم ما خلاص هتحس
ان حياتها اهي بتضيع
وان عليها يا تقبل بيه
يا هتفضل تحت التصنيف
يا جماعة عايشة في بلاعة
ولا نقول عايشين في مجاعة
كله بينهش عرض الكل
يا سادة اسمها حرِّية
علشان عمري ما هبقي لقيَّة
وكمان ليا الحق وهي
اننا نختار راجل صح
نختار ضهر بيسند يحمي
يحتوي قلبي انا يوم ما هيضعف
راجل يعرف قيمتي انا صح
راجل يوم ما يكون اختارني
اختار زوجة ثمَّ حورية
تحفظ بيته تربي ولاده
تكرم اهله تحب اخواته
يعرف بعد العشرة سنين
ان في يوم ما اختارني انا لِيْهْ
اختار صح

كلمات : ولاء محمد