#خلاص بنلِم في عزالها
وقلبي مداري ف دموعه
وفستانها وطرحتها
يدبوا الخطفة في ضلوعه
هتخطف منّي ضحكتها
اللي بتنور ساعات يومي
ولمستها اللي بتهون
عذابي وحيرتي وهمومي
وضمة حضنها الدافي
ده بيداوي الجراح فيّا
وتنطيتها وفرحتها
اللي بتزود ضيا عنيا
يا بنت العمر والأحلام
يا أحلي علاج لأي آلام
كبرتي يا نور عنيا أوام
بقيتي عروسة بسم الله
وادي الفستان مع الطرحة
خلاص علي جنتك رايحة
طب اعمل ايه انا ف قلبي
ف ساعة لما نصحى الصبح
وما يشوفكيش هنا جنبي
هاكمِّل يومي بس ازاي
ومين غيرك هايبقى معاي
في وقت الفضفضة م الهم
يا بنتي دانتي أجمل أم
يا نسمة عمري وسنيني
ندى المايّة اللي ترويني
أنا مش عارفه ارد ب إيه
فى لحظة لما يسألني
دولابك لما هتغيبي
سريرك لما هتفارقيه
وأوضتك لما هتضلم
عشان مش لاقية فيها حياة
صحيح اليوم ده بتمناه
و عايشة حياتي بستناه
لكن حاسه انه غفِّلني
وجاي بيخطفك منِّي
يا رب يا روحي تتهني
مع القلب اللي بتحبيه
بقولِك إيه
في نن عينيكِ جوّه شيليه
ده بيحبك ف حافظي عليه
ولو فكر في يوم انه 👌
أكيد عارف هايحصل ايه
حبيبتي ربنا يصونك
ويبعد عنك الأحزان
ما اشوفش الدمعة ف عيونك
وبيتك يبقى بر أمان
التعليقات مغلقة.