ولو مش لاقي الخير فِ الناس
قول للوحده بالأحضان
نصيحة قالوها أهل زمان..
يا ولدى الصحبة مش لمّة
ولا كترة بدون قيمة
ولا شلة بتتجمع
في يوم على عرض ف السيما
ياولدي صحبتك دي سلاح
بيعمي عيون عدوينك
يكبَّر فيك وما يهينك
ولا يدينك.
دا يحميك حتى من نفسك
يمزّع فيك خيوط يأسك
كمان أمسك..
هايبني قصاده سور يأجوج
وتنسى مين وليه جرحوك
ما يبقاش منّه غير عِبره
سنين خبرة..
يساندوا وقفتك ف الجاي
وزي الضي..
ينور ليلك الزعلان .
وكان ياما كان..
حكولنا من العِبر ألوان
قالولنا الخِل لخليله .. على دينه
على ملِّة وفا قلبه
وكمان صلبه..
وضهر يشيله لو مَحني
بلاش تحني..
ولا تطاطي لأي وجوه
دا لو واحد..
وكتفه تملّي ورا كتفَك
بيسند فيك وبيكاتفَك
ويملا م الأصول كفّك
بيكفي م الصحاب ملايين
معاك لسنيين
وعمره يا ولدي ما يذلّك
ولا يفرح في يوم ذُلّك
ويوم ما تتوه..
تلاقي ضِله بيدلّك
ويندهلك ..
وحتى ان كانش من اهلك
ولا دينك .. ولا لونك
ده صاحبك عمره ما يخونك
ده صاحبك يابني هايصونك
وف الشدة يكون عونك.
زمان قالها كمان جّدي
دي طيبة الأصل ما تصدّي
ولا تهدّي ولا دقيقة
دا أول ضَهر ف الضيقة
يكون واقف
يكون عمدان
صاحبك يابني أصله يبان
في يوم ما الدنيا تيجي عليك
مروءة تملّي سبّاقة
ومهما الدنيا سراقة
ماتسرقش الوفا منُّه
يكون جنبك ..
بيشهد لك بكل الخير
ف لمّا تنقّي يوم صاحب ..
يا ريت يبقى يا ولدي أصيل
يا ريت يبقى يا ولدي أصيل.
التعليقات مغلقة.