لمحته وهو متبسّم
بشوق ف النني متقسّم
وكان م اللهفة بيتمتم…
يا سمرا ياللي عيونك ضيّ
بتضوي تحلّي ايامي
ورب الكون وجمالك.
ما بشُفش غيرك قدامي
يا أحلامي..
يا سحر الكون ياخلّابة
جمالك والله دا سحابة
تمطّر ع القلوب بسَمات
يا جنة وعرضها سموات
يا فرحة بتحيي عمر و مات
في كل اوقات…
بدعي لربي لي تكوني
يا رحمة مزوّقة كوني …..
يا مجنوني
دا عشقك صحَّى فيَّ حنان
خلى الحرف منّي جنان
بيمحي جوة منّي دموع
ماتيجي نشقلب الموضوع
واقول لَك ايه بيحصلّي
بكلمة شوق بتوصلّي
تخلّي الهمسة منّك روح
ويسري ف دمي عطر يفوح
بعشق جماله ربّاني
يا مخلوق بس علشاني
يا وجداني
يانعمة قليلها يرضيني
يا لمسة بتحيي تكويني
وتسحب مني تنهيدة
تاخدني لدنيا وبعيدة
وجنة بعيشها بس معاك
سبحانه م الحنان سوّاك
انا عشقاك
وبعشق عشقي من عشقك
دا عشق الكون بيركع لك
وبيقُولك..
حِن شويّة ع العشاق
بدرس يعلّم الاشواق
ويحيي الرحمة جواهم
يا أحلاهم
يا واخد من نعيم الشوق
نصيب قلب الاسد احساس.
احلف بإيه بحبه يا ناااس
وبعشق جنة مخلوقة
من نعيم حضنه
ف.أدمنته
دا قلبي ف جنته درويش
نبضي لوحده ما بيحييش
انا بالحب عايشاله
ومن غير حبه..
رافضة اعيش
