جـانا العـيد وهانعيّد وهانترحم ع الشيخ سيد ونسمي بإسم الرحمن ندبح ف خروفنا المتقيد ماهو أصل الشيخ سيد جدّي مُقرىء ومُحفّظ للقرآن.. وزمان ف العيد على أيامه الخير شُفناه أشكال والوان.. كانت فرحتنا ف لمتنا والعيد بيعيّد من بيتنا وتملّي نكمّل سعادتنا بصنية فتّة لكل جيران أنا جدّي ده كان لبسه القفطان والجبّـة منورها الرحمن وتملّي الذِّكر على لسانه بيحصّن بيتنا من الشيطان كان قلبه تملي مجمّعنا على حرف الله بيجمعنا وف كل اعيادنا يمتعنا بتكبيرة تصحصح كل ميدان أنا جدّي ده كان قدوة وهيبة الكلمة ف قوتها عجيبة وعصايته ترن من الشارع وقعتها ع النفس مريبة وبمسحة بإيده يهـدِّينـا وف حضنه الطاهر يرقينا ترتيله بهمس يخلينا نشبع حنيّة مع طيبة أنا جدّي ده كان أعظم إنسان ف وجوده ما كان للبُعد مكان وف كُل اعيادنا ده من خيره علي طول بيجمّع ف الخـلّان ويفرق فـرحة يهادينا وبروحة الهادية يراضينا دا مهما اعياد مرِّت بينا ولا تشبه يوم من طعم زمان واهو جدي خلاص ساب دنيتنا للضلمة تعشش في بيوتنا والغل بقاله مابينا مكان مبقتش اعيادنا بتسعدنا ومفيش معنى لجبران خاطر والفرحة بيخطفها الشاطر واهو صوت الحق خفاه الباطل والبركة اهي قلّت في عشيتنا فياريتنا نقـول ونتعـوّد أهو جانا العيـد وهانعيّـد ونسمي بإسم الرحمن ونترحّم ع الشيخ سيد ❤️ #كل_عام_وانتم_بخير ❤️ #أسماء_كامل
التعليقات مغلقة.